Proclamatie Bert I
Bie de gratie en de wiesheid van C.V. “De Aester”:
Regerendj Prins van ‘t Aesterriek.
‘ne Echte Echtenieër en groatvors van de Esstraot.
Al sinds 11-11-11 gelökkig getroudj mit Yvonne en trotse pap van Sem en Ise.
Aodste zoon van Herman en Mirjam en broor van Joost en Koen.
Bezig aan zien 39ste laevesjaor.
Vastelaovesvierder in hert en nere en al sinds 1996 lid van C.V. “De Aester” Echt.
Sluitj al mieë es 22 jaor de knöppele es drummer van Knallermann.
Organiseertj mennig fieëske in Ech es väörzitter van ‘Echt Feesten’.
Trainer van ‘t leukste jeugdteam bie E.V.V.
Perbeertj zoa noe en den op zóndigmörge ‘n rundje te fietse mit de men van Team ‘Zoermoos’.
In ‘t dageliks laeve leijinggaevendje bie de IT-aafdeiling van Zuyderland.
Gaeve te kènne en make bekèndj:
- det Yvonne en ich hieël gruuets zeen det ich tót 66ste Prins van ’t Aesterriek bön gekaoze;
- det väör mich es vastelaovesvierder in hert en nere, ‘ne druim is oetgekómme;
- det ich mit väöl passie en energie in de vootspaore zal traeje van mien ieërbiedwaardige väörgengers;
- det ich blie bön mit mien veer fantastische adjudante: Rob, Tom, Wilian en Auwt-Prins Roel I;
- det mien jubileumreceptie ‘ne groate bóntje storm van vereniginge en luuj moog waere;
- det de vlagge op de Plats en in top van de Landricuskirk druueg mótte blieve deze vastelaovendj;
- det ich mien femielie en vrunj dit jaor gaer väör miene Prinsewage zeen loupe in de groate optoch;
- det mien kammeräöj van ‘Echt Feesten’! ouch dit jaor weer ‘n geweldige editie van ’t Echter Vastelaoves Spektakel gaon neerzitte, wo ich uch allemaol haop te zeen;
- det Knallermann dit vastelaovessezoen gewuuen geitj optraeje mer den waal mit ‘ne goje vervangendje drummer;
- det ich d’r alles aan gaon doon óm dit prachtig stökske cultuur door te gaeve aan de volgendje generatie;
- det ich, same mit miene jeugdprins, mien femielie, vrunj en alle Aesters en Aesterlingskes, groat of klein, d’r ‘ne ónvergaetelike en fantastische vastelaovendj van gaon make ónger mien motto:
“Kóm op, knalle man, w’r make d’r ‘n ech fieëske van!”
Gegaeve te Ech op 15 november 2024
tiedes de “Nach van de nuje Prins”
Auwt-Prins Roel I
